Sunday, January 3, 2010

బిల్కిస్ బానో


నిన్నెలా మర్చిపోవాలి?
అలా కవిత్వం పాడుకోవాలని
ఆకాశం వైపు చూస్తే
చుక్కలన్నీ నీ ముఖాలై
నన్నే చూస్తుంటాయి
నిన్ను తప్పించుకోవాలని
నా పిల్లల అమాయకపు కళ్ళల్లో తలదాచుకుంటే
అక్కడా నువ్వే
విలాపాల విషాద దృశ్యమై..

ఏ దేశం...ఏ ప్రాంతం
ఏ భాష...ఏ సంస్కృతి

ఆకాశమంత మచ్చ
ఏ వెలుగు నీళ్ళతో కడిగేయగలం?
విలువల కోసం కలలుకనే కళ్ళల్లో
ఇక నీ ముఖమే
గడ్డకట్టిన అశ్రుకణమై తిరుగుతుంది

నమ్మకాలను నమ్ముకున్న చేతులకు
నీ ముఖం బిగిసిన సూర్యుడంత పిడికిలవుతుంది
న్యాయపోరాటాల పాటకు పల్లవి ఇక నువ్వే
నిర్భయాల బతుకు పుస్తకాలకు
ముందు మాటవు నువ్వే
రోజూ నేను కలిపే అన్నంలో
మొదటి ముద్దవు నువ్వే.

[2002 గుజరాత్ ఊచకోతలో నిండు గర్భిణి బిల్కిస్ బానోపై దుండగులు సామూహిక అత్యాచారం చేశారు. కుటుంబంలో అందర్నీ కోల్పోయినా..భర్త సాయంతో న్యాయ పోరాటం చేసి దోషులకు శిక్షపడేదాకా ఆగలేదు]

No comments:

Post a Comment