
జాయ్ ఆఫ్ గివింగ్
మీనింగాఫ్ లివింగ్
ఐడియా అదిరింది
ఇవ్వడం అంటే ఇవ్వడమే.
తీసుకోవడానికి పన్నే వ్యూహం కాదు
మబ్బుచెలమ చెలిమి
సెలయేతి గలగలల కలిమి
ఉదయ కిరణం వెచ్చదనం..
గాలి కెరటం చల్లదనం
వాటికి తెలుసు ఇవ్వడమంటే ఇవ్వడమేనని
మన గుండెల్లో ఆనందాన్ని తోడి
మరో మనసు మడిని తడపాలి
పెదాలమీద పువ్వుల్ని కోసి
ఇరుగుపొరుగు గుమ్మాలకు వేలాడదీయాలి
కళ్ళల్లో కాంతులు .... కలల్లో ఆశలు
ఇచ్చుకో...ఎవరికైనా ఇచ్చుకో..
ఇచ్చుకోవడమంటే
పుచ్చుకోవడానికి వేసే
పకడ్బందీ పథకం కాదు
కడుపునిండా అన్నం తింటున్నపుడో..
కంటినిండా కునుకుపడుతున్నపుడో..
నువ్వెవరికో పట్టెడన్నం పెడుతున్నట్టు
అనాథ బిడ్డనెవరినో జోకొడుతున్నట్టు
ఒక పాట సన్నగా
నీ ఇంటి గోడల గొంతుల్లోంచి జాలు వారాలి
ఇవ్వు...
జీతంలోంచో...జీవితంలోంచో
కొంచెం పక్కన పెట్టి పక్కవాడికివ్వు..
కొడుక్కిచ్చినట్టో ..కూతురికిచ్చినట్టో అపరిచయస్తులక్కూడా
ఆత్మీయతల ఆలింగనాలిచ్చి
మబ్బు నీడతో ఆడుకుంటున్న
గరికపచ్చ మైదానంలా గాలికి అలా అలా తేలిపో..
కష్టపడి దాచుకోవడం కష్టమే...
ఇష్టపడి ఇచ్చుకోవడంలోని ఆనందాన్ని తట్టుకోవడం మరీ కష్టం..
ఏ రిజిష్ట్రార్ ఆఫీసులోనూ
రక్తకణాల దస్తావేజులుండవు
కాగితాలమీద అక్షరాల్లో ఆస్తులు
గీతల్లో సరిహద్దులు..
మనదంటూ ఏదీ కాదన్న మాట మట్టికి మాత్రమే తెలుసు.
చాచిన చేతుల్లో నిన్ను నువ్వు వొంపుకో
జాలి చూపుల్లో నిన్ను నువ్వు నింపుకో
మనదీపంలోంచి కాస్త వెలుగు...
మన ఇంద్రధనుస్సుల్లోచి నాలుగు రంగులు
అలా జల్లుకుంటూ వెళ్ళిపోదాం
మనిషినీ మనిషినీ అల్లుకుంటూ సాగిపోదాం
ఆర్టాఫ్ లివింగ్ అంటే ఆర్టాఫ్ గివింగే.
[జాయ్ ఆఫ్ గివింగ్ డే సందర్భంగా]
No comments:
Post a Comment